«Кыргызтелеком» ААКнын башкы директору Н.С. Мадаминов Нарын жана Ысык-Көл облустарына жумушчу сапар менен барды. Сапардын жүрүшүндө мамлекеттик органдардын өкүлдөрү, аймактык бөлүмдөрдүн жетекчилери жана компаниянын филиалдарынын жамааттары менен жолугушуулар өттү, алардын башкы темасы аймактардын санариптик инфраструктурасын өнүктүрүү болду.
Сапардын маанилүү бөлүгү жергиликтүү бийлик менен өз ара аракеттенүү болду. Нарын облусунда Н.С. Мадаминов Кыргыз Республикасынын Президентинин ыйгарым укуктуу өкүлү Нурбек Бейшеналиевич Сатаров менен, Ысык-Көл облусунда — Президентинин ыйгарым укуктуу өкүлүнүн биринчи орун басары Данир Белекович Иманалиев менен жолугушту.
Компания облустардын санариптик инфраструктурасын өнүктүрүү үчүн негизги багыттарды жана технологиялык мүмкүнчүлүктөрдү тааныштырды. Тараптар өз ара аракеттенүү механизмдерин жана аймактык долбоорлорду биргелешип ишке ашыруунун келечегин талкуулады.
Талкууланган темалардын катарында — «Коопсуз аймак» долбоору, санариптик теңсиздикти жоюу, «Таза асман» долбоору, эс алуу жайларын санариптештирүү, ошондой эле локалдык тармактарды куруу, жаңылоо жана техникалык жактан тейлөө.
Коопсуздук маселелерине өзгөчө көңүл бурулду. Башкы директор Нарын жана Ысык-Көл облустук ички иштер башкармалыктарынын кырдаалдык борборлоруна барып, Нарын облустук ички иштер башкармалыгынын башчысы Жолболду Паязбекович Кочконов жана Ысык-Көл облустук ички иштер башкармалыгынын башчысы Мурат Самидинович Боронов менен жолугушту. Жолугушууларга катышкандар кызматташтыктын маанилүүлүгүн белгилеп, видеокөзөмөл камераларын байланыш каналдары менен камсыз кылуу маселелерин, ошондой эле ички иштер органдарынын объектилерин мындан ары санариптештирүүнү талкуулашты.
Сапардын чоң бөлүгү «Кыргызтелеком» ААКнын аймактык бөлүмдөрүнүн ишине арналды. Облустук филиалдардын жамааттары менен өткөрүлгөн жумушчу сессияларда учурдагы милдеттер, инфраструктураны өнүктүрүүнүн келечеги, кызматтардын сапатын жогорулатуу жана ар бир аймактын муктаждыктарын эске алуу менен жаңы санариптик долбоорлорду ишке ашыруу маселелери каралды. Башкы директор ошондой эле компаниянын Нарын облусунун Ат-Башы районундагы жана Ысык-Көл облусунун Ысык-Көл районундагы райондук бөлүмдөрүнө барды.
Н.С. Мадаминов ошондой эле РПО РМТРдин Чыгыш радиорелелик станциялар башкармалыгына барып, РПО РМТРдин башкы директору А.Т. Жолоров жана башкармалыктын жамааты менен жолугушту. Санариптик телекөрсөтүүнү өнүктүрүү, биргелешкен долбоорлорду ишке ашыруу жана мындан аркы кызматташтыктын келечеги талкууланды. Мындан тышкары, ал Ала-Мышык жана Оргочор станцияларынын ишмердүүлүгү жана кызматкерлери менен таанышты.
Сапардын жыйынтыгында аймактык мамлекеттик органдар менен өз ара аракеттенүүнүн жана компаниянын бөлүмдөрүн өнүктүрүүнүн артыкчылыктуу багыттары аныкталды. «Кыргызтелеком» ААК аймактарда телекоммуникациялык инфраструктураны модернизациялоо, заманбап байланыш кызматтарынын жеткиликтүүлүгүн кеңейтүү жана санариптик долбоорларды ишке ашыруу боюнча иштерди улантат.
