Баткен облусу, 2025-жылдын 24-декабры. ОАО «Кыргызтелеком» DCASA (Digital CASA – Кыргыз Республикасы) долбоорунун алкагында түзүлгөн инфраструктуранын негизинде Баткен облусунун тургундарын жогорку ылдамдыктагы интернетке жана кабелдик телекөрсөтүүгө туташтыруу иштерин улантууда. Бул долбоор өлкө боюнча була-оптикалык байланышты (ВОЛС) кеңейтүүгө олуттуу шарт түзүп, анын аркасында Кыргызстан боюнча, анын ичинде Баткен облусунда да заманбап байланыш кызматтарын жеткирүүгө мүмкүнчүлүк пайда болду.
Магистралдан — үйлөргө чейин: айылдарда туташтыруу иштери башталды
Магистралдык линиялар жана негизги түйүндөр курулуп, ишке киргизилгенден кийин, Баткен облусундагы негизги басым эми түздөн-түз жеке абоненттерди (үй чарбаларын) туташтырууга коюлууда. Филиалдын маалыматы боюнча, иштер этап-этабы менен жүргүзүлүп, бардык айылдарды камтууну көздөйт.
Биринчи этап:
- Чек айылы (азыркы учурда иштер жүрүп жатат),
- мындан соң — Жаңы-Жер айылында абоненттерди туташтыруу башталат.
Экинчи этап (Кадамжай району):
- Камбарабад, Ирелеш, Миң-чынар айылдары.
Андан кийинки этап (Лейлек району):
- Тогуз-Булак, Айбике, Кара-Булак айылдары.
Компания белгилегендей, мындай ырааттуулук байланыш линиясын даярдоодон тартып, үй чарбаларын туташтыруу жана кызматтарды настройкалоого чейин иштерди системалуу жүргүзүүгө мүмкүнчүлүк берет.
Байланыштын үч мууну: жез кабелден GPONго чейин
ОАО «Кыргызтелеком» компаниясынын Баткен облусундагы филиалынын директору Максатбек Маджитов акыркы жылдары аймактагы байланыш инфраструктурасы суроо-талап менен катар модернизацияланып келгенин белгиледи:
«Мурун интернетке туташуу көп учурда эски жез кабелдер аркылуу жүргүзүлчү, ошондуктан ылдамдык төмөндөп кетчү. Андан кийин Metro Ethernet технологиясы киргизилди. Азыр болсо биз абоненттерди эң алдыңкы GPON технологиясы аркылуу туташтырып жатабыз. Бул сапаттын такыр башка деңгээли: бир оптикалык линия аркылуу 64 абонентке чейин туташтырууга болот. Эң негизгиси — мурда “техникалык мүмкүнчүлүк жок” деген себеп менен туташтыра албай калган учурлар азаят. Дагы бир артыкчылыгы — жогорку ылдамдык жана ошол эле линия аркылуу үйдөгү стационардык телефонду да кошо туташтырууга мүмкүнчүлүк бар», — деди Максатбек Маджитов.
GPON технологиясы бир линия аркылуу көп абонентти тейлөөгө шарт түзгөндүктөн, аймактарда туташтыруу иштери ылдамыраак жүрүп, кызмат көрсөтүүнүн сапаты жогорулары күтүлүүдө.
Кантип туташууга өтүнмө берсе болот
Баткен облусунун тургундары туташуу үчүн төмөнкү жолдор аркылуу кайрыла алышат:
- ОАО «Кыргызтелеком» компаниясынын сервис борборлоруна,
- 1812 кыска номерине чалып (контакт-борбор),
- же kt.kg сайты аркылуу онлайн өтүнмө калтырууга болот.
