«Кыргызтелеком» ААК Кыргыз Республикасынын аймагында алгачкы жолу Ысык-Көлдүн жээгинде өтө турган эң таасирдүү эл аралык спорттук иш-чаралардын бири — суудагы Formula-1 (F1H2O UIM World Championship) дүйнө чемпионатынын техникалык демөөрчүсү катары чыгууда.
Чемпионатты даярдоонун жана өткөрүүнүн алкагында «Кыргызтелеком» ААК иш-чара өтүүчү аймакты жогорку ылдамдыктагы интернет тармагына туташтырып, уюштуруучулардын, эл аралык командалардын өкүлдөрүнүн, жалпыга маалымдоо каражаттарынын, өнөктөштөрдүн жана мелдештин конокторунун үзгүлтүксүз иштөөсү үчүн ишенимдүү санариптик инфраструктураны камсыздайт.
Жогорку ылдамдыктагы тармак маалыматтарды туруктуу өткөрүүгө, түз эфирлерди уюштурууга, басма сөз борборунун ыкчам иштөөсүнө, мелдештерди онлайн чагылдырууга жана иш-чаранын бардык катышуучуларынын санариптик кызматтарга ыңгайлуу жетүүсүнө шарт түзөт.
«Кыргызтелеком» ААКтын техникалык демөөрчү катары катышуусу компаниянын дүйнөлүк деңгээлдеги иш-чараларды колдоого, өлкөнүн санариптик инфраструктурасын өнүктүрүүгө жана ири эл аралык аянтчаларда заманбап телекоммуникациялык технологияларды жайылтууга умтулуусун ырастайт.
«Суудагы Formula-1 чемпионатынын техникалык демөөрчүсү болуу биз үчүн чоң сыймык. Биз уюштуруучуларга, спортчуларга, журналисттерге жана конокторго байланышта болуп, маалыматты ыкчам алмашууга мүмкүнчүлүк берген ишенимдүү телекоммуникациялык инфраструктураны камсыздайбыз. “Кыргызтелеком” эл аралык сапат стандарттарына жооп берген заманбап санариптик чечимдерди түзүүнү улантууда», — деп белгилешти «Кыргызтелеком» ААКтан.
F1H2O UIM World Championship чемпионатынын Кыргызстанда өткөрүлүшү өлкө үчүн маанилүү окуя болуп, эл аралык кызматташтыкты өнүктүрүүгө, Ысык-Көл облусунун туристтик потенциалын жайылтууга жана Кыргызстандын дүйнөлүк аренадагы таанымалдыгын жогорулатууга өбөлгө түзөт.
«Кыргызтелеком» ААК санариптик экономиканы өнүктүрүүгө, телекоммуникациялык инфраструктураны кеңейтүүгө жана калкты заманбап, сапаттуу байланыш кызматтары менен камсыз кылууга багытталган ири долбоорлорду ишке ашырууга жигердүү катышууну улантууда.
