2025-жылдын 22-июлунда Душанбе жана Бишкек шаарларында өтүп жаткан Борбордук Азия эл аралык экономикалык форумунун алкагында «Кыргызтелеком» ААКнын башкы директору Нурлан Сабырович Мадаминов онлайн-форматта баяндама жасады. Анын баяндамасынын темасы — «Экономиканын тармактарын санариптик өнүктүрүүдө байланыш операторлорунун ролу» болду.
«Байланыш операторлору — санариптик экономиканын негизи. Алар бардык тармактардын санариптик трансформациясы үчүн зарыл болгон инфраструктураны, технологияларды жана кызматтарды камсыздашат. Технологиянын ыкчам өнүгүп жатышы жана байланыштын ылдамдыгы менен сапатына болгон талаптардын өсүшү шартында алардын ролу барган сайын маанилүү болуп баратат», — деди Нурлан Мадаминов форумдагы сөзүндө.
Ошондой эле «Кыргызтелеком» ААКнын катышуусунда ишке ашырылып жаткан ири улуттук долбоор — Digital CASA – Кыргыз Республикасы өзүнчө тааныштырылды. Бул долбоордун алкагында өлкөдө 3000 чакырымдан ашуун була-оптикалык байланыш линиялары тартылып, 4000ге жакын социалдык объект туташтырылган жана жогорку өткөрүмдүүлүккө ээ заманбап магистралдык түйүн түзүлгөн. Мындан тышкары, Казакстан жана Өзбекстан менен жаңы чек ара аралык байланыштар уюштурулган.
Нурлан Мадаминов Кыргыз Республикасынын жетекчилигине санариптик демилгелерди колдогону үчүн ыраазычылык билдирип, регионалдык кызматташууну улантуунун маанисин белгиледи:
«Кыргыз Республикасынын жетекчилигинин колдоосу туруктуу санариптик экосистеманы түзүүдө негизги роль ойнойт. Бул экосистема бизнес, билим берүү, саламаттык сактоо жана башка маанилүү тармактар үчүн жаңы мүмкүнчүлүктөрдү ачат. Бул тажрыйба региондогу башка мамлекеттерге үлгү болуп, биргелешкен долбоорлор менен демилгелерге шыктандырышы мүмкүн», — деди «Кыргызтелеком» ААКнын жетекчиси.
Баяндама учурунда айтылган сунуштардын катарында — «Евразиянын жүрөгүнө саякат» автокербенинин алкагында туруктуу биргелешкен иш-чараларды өткөрүү жана КМШ өлкөлөрүнүн Байланыш тармагындагы регионалдык шериктештиктин Аткаруу комитетин санариптик долбоорлорду координациялоого активдүү тартуу каралган.
«Кыргызтелеком» ААКнын башкы директорунун бул сөзү Борбор Азиядагы санариптик өнүгүүнүн келечеги боюнча талкууга маанилүү салым болуп, Кыргызстанды технология жана инновациялар жаатында регионалдык диалогду бекемдөөгө умтулган мамлекет катары көрсөттү.
